英足盃8強壓軸大戰上演英超內訌，「錘仔幫」韋斯咸主場硬撼列斯聯。雙方都心繫聯賽護級，今仗盃賽戰意難料，列斯聯自從射手卡維特利雲熄火後踢得更保守，海軍鬥水兵格局，捧中位數2.5球入球細最上算。（Now 651周日晚11時30分直播）文:法達斯維

雙方喺聯賽深受降班威脅，韋斯咸依家淪落到尾3，列斯聯好少少排第15位，但只係領先「錘仔幫」3分咁大把，由於英超係一個大金礦，一旦降班嘅話，球隊損失甚大，因此保住英超席位絕對係大過天，今仗晉級固然開心，就算出局亦唔會好失望，總之唔好增添傷兵影響聯賽，隨時踢到就住就住。

卡維特利雲近6場食白果
當然大家本身實力都麻麻，好彩防守尚算硬淨，韋斯咸近4仗錄得1勝2和1負，包括打和曼城同賓福特。列斯聯亦唔差，各項賽事近8仗僅2敗，其中作客曾經打和過車路士同維拉，不過早前入波停不了嘅箭頭卡維特利雲，近6次為列斯聯披甲全部食白果，佢嘅拍檔盧卡斯尼美查近期同樣腳風唔順，難怪球隊近7仗只係入得5球，其中3粒仲要係來自上圈英足盃對英冠仔諾域治，而呢7仗有6次係開2球或以下，可見攻力有幾咁疲弱，預計今仗都唔慌多波入，2.5球入球細玩得過。