今輪英超紐卡素主場硬撼諾定咸森林。「喜鵲」近4場聯賽3敗，跌到第7位，不過排第3嘅森林近期亦好飄忽，近3場聯賽2負，今場屬爭前4「6分波」，近5次聯賽交手紐卡素錄4勝1負，往績食住對手，吼實主勝。（Now 621及611周日晚10時直播）文:邪神

森林近期作客腳軟
雖然話紐卡素嚟緊最大目標係英聯盃，但對利物浦嘅決賽3月中先踢，主帥艾迪侯域現時大可放番多啲精力落聯賽。「喜鵲」近期陷入低潮，近4仗贏得1場，再唔搶分爭前4就愈來愈渺茫，若然失落歐聯入場券嘅話，艾迪侯域同樣有壓力，今晚面對直接競爭對手森林，自然不容有失。「喜鵲」好消息係中前場攻擊陣容幾近「夫添」，除祖連頓有傷在身外，阿歷山大伊沙克、安東尼哥頓及辛度東拿利等主力喺晒度，加上主場出擊，只要發揮正常，自然可以重回勝軌。

森林今季驚喜不斷，不過近期作客就稍為遜色，近兩場聯賽作客先後不敵般尼茅夫及富咸，英足盃造訪低組別嘅埃克塞特，都要踢到互射12碼先驚險晉級，加上佢哋對「喜鵲」往績輸多贏少，今場嚟到聖占士公園，睇怕都要擺低3分。